TGRTC : Ab hoga Safar Aasaan.. Ek QR Code aapko Manzil tak Pahunchaayega

 

TGRTC Digital System : Telangana ke musafiron ke liye ek badi khushkhabri hai. Ab bus ka safar aur bhi aasan hone ja raha hai. Telangana State Road Transport Corporation (TGSRTC) ne ek naya tareeqa amal me laya hai. Digital payment system (UPI )  ko apni tamam bus services mein shamil karne ka faisla kiya hai. Ab musafir  chhutte paise ki fikr kiye baghair  QR code ke zariye asani se apna kiraya ada kar sakenge.  

TGRTC Digital System : Hyderabad Mein Kamiyab Tajurba   

TGSRTC ne pehle chand bus services par digital payment ka tajurba kiya. jo kaafi kamiyab raha.  Hyderabad ke Bandlaguda aur Dilsukhnagar jaise mukhtalif depots mein ye nizaam bhuth accha asar dikhane laga hai. Yeh sirf musafiron ke liye hi nahi, balki  bus conductors  ke liye bhi bohut madadgaar sabit ho raha hai. kyunki is se  ticket dene ka tareeqa tezi se mukammal ho jata hai. aur cash (Paisa) handle (len den) karne ka masla bhi door ho jata hai. 

Lambe Safar Ki Buses Mein Pehle Se TGRTC Digital System    

Agar aap air-conditioned long-distance buses mein safar karte hain to aapko pehle hi digital payment ka option mil chuka hoga. Yeh system pehle sirf chand bus routes tak mehdood tha, lekin ab isay  Telangana ke tamam buses mein  aam kiya ja raha hai.   

Ab Sirf Chand Seconds Mein kiraya Ada  

 RTC ke mutabiq, musafir  QR code scan karke apna kiraya sirf 30 seconds mein ada kar sakenge. Yeh system bohot hi tez hai.  magar RTC ki technical team isay aur behtar banane aur payment ka waqt mazeed kam karne par kaam kar rahi hai.  

Is system ko mukammal taur par laagu karne ke liye RTC ne  Intelligent Ticket Management System (i-TIMS)  ke 10,000 machines ka order diya hai, jismein  6,000 machines pehli phase mein faraham ki gayi hain.   

Pehle Shehri Buson Mein laagu 

Pehle yeh naye ticketing machines sirf Hyderabad,  Warangal aur dosre shehri ilaaqon ki buses mein install ki ja rahi hain. lekin RTC ka mansuba hai ke  inhein dheere dheere Telangana ke har ilaqe tak pohnchaya jaye.  Iska sabse bara faida yeh hoga ke  cash transactions ka jhanjhat khatam ho jayega.  aur RTC ki service mazeed tez aur behtar ho jayegi.   

Conductors Ki Khaas Training   

i-TIMS machines  touchscreen technology  par kaam karti hain.  is liye RTC ne bus conductors ko  3 mahine ki khaas training  di hai taake naye nizaam par woh behtareen tareeqe se kaam kar sakein. Training ke douran kuch technical masail samne aaye jo ke RTC ki technical team solve kar rahi hai.