PM Modi | Hindi Nafiz Karne me koi Zabardasti nahi

PM Modi : Hindustan (India) me  National Education Policy (NEP) ke tahat zabardasti Hindi thopne ka ilzam lagane wale Tamil Nadu ki sarkar aur markazi hukumat (Central Goverment) ke darmiyan lafzon ki jung chhidi hai. Iss beech  Prime Minister Narendra Modi ne ek ahem bayan diya hai. unhone isbaat ki safaayi di hai ke  Hindustan ki mukhtalif zubanon (languages) ke darmiyan kisi qisam ki dushmani nahi hai. balke har zuban doosri zuban ko aur behtar banati hai.  

PM Modi ne  Delhi ke Vigyan Bhavan me hone wale 98th All India Marathi Sahitya Sammelan me yeh bayan diya.  Unka kehna tha ke  Hindustan ki mukhtalif zubanon ke darmiyan koi takraar nahi hai aur yeh sab aik doosre ki taraqqi ka sabab banti hain.

Har Zuban Aik Doosri Ko Mazid Behtar Banati Hai   

Modi ne apne taqreer me yeh wazahat ki ke 'Hindustan ki sabhi zubanein ek doosre ka sahara karti hain aur ek doosri ko mazeed behtar banati hain. Halankeh kuch log zubanon ki buniyad par tafriq dalne ki koshish karte hain.  magar hamara mila-jula zubani virasat (linguistic heritage) aise tamaam afwaahon ka jawab deta hai.  Har zuban ki taraqqi hamari samaji zimmedari hai.  isliye humein sabhi zubanon ki izzat karni chahiye' 

PM Modi ne yeh bhi kaha ke  Marathi bhasha ke ilawa desh ki har mukhtalif zabaan me taleem ko farogh dene ki sarkari koshish jari hai.

Higher Education Ka Farogh  

PM Modi ne Maharashtra ke talib-e-ilm (students) ki misaal di aur kaha ke Maharashtra ke naujawaan Marathi zubaan me hi higher education, engineering aur medical ki taleem haasil kar rahe hain.  Unhone yeh bhi kaha ke   

'Adab (literature) aik aaina hai jo  asal surat dikhata hai aur usko seedha rasta dikhata hai. literary conferences aur adabi idare is silsile me ahem kirdar ada kar rahe hain'. 

Bharat Ka Zabani Ittehad  

PM Modi ne Bharat ke zabani tanavvo (linguistic diversity) ka zikr karte hue kaha 'Hindustan duniya ka sabse bada zabani ikhtilaf (language diversity) rakhnay wala mulk hai. Yeh  hamari qaumi ekta ki buniyad hai. Humein isko mazid mazboot karna hai aur kisi bhi ek zuban ko dusre par thopne ka irada nahi hona chahiye'

Tamil Nadu Ki Hukumat Ka Radde- Amal    

Jabse NEP me  Trilingual Policy ka zikar aaya hai. Tamil Nadu ki hukumat is par khafa nazar aayi hai. Tamil Nadu ke Chief Minister  M.K. Stalin aur Deputy CM Udhayanidhi Stalin ka kehna hai ke  markazi sarkar Hindi ko zabardasti Tamil Nadu par nafiz karne ki koshish kar rahi hai. Unka daawa hai ke yeh ek tarah se Tamil aur dusri maqami (regional) zubanon ke khilaf ye ek saazish hai.  

Har ek zuban ke izzat 

Modi ka yeh bayan aise waqt par aaya jab Tamil Nadu aur central government (Markazi Hukumat) ke darmiyan taluqat is masle par kharab chal rahe hain. PM Modi ne apne bayan me yeh wazahat kar di ke  markazi sarkar kisi bhi ek zuban ko zabardasti nahi thop rahi. balke har ek zuban ke izzat aur taraqqi par kaam kar rahi hai.