Jua kya hota hai aur Islam mein kyu mana hai? : Why Gambling Is Prohibited in Islam

 Islamic financial system mein  Jua (Gambling)  ek buniyadi taur par  haram (mana kiya gaya) amal hai. Arabic zubaan mein isay  “Maysir” ya  “Qimar”  kaha jata hai.

Jua asal mein har aise amal ko kehte hain jisme koi shaks  sirf kismat (chance)  ke zariye kuch jeetta ya haar jaata hai. Dusre lafzon mein, ye ek aisa khel hai jahan ek insan doosre ke nuksan par faida uthata hai. Jitne wala insaan asal mein wo maal halal tareeqe se nahi kamata, aur haarne wala bagair kisi wajah ke apna maal kho deta hai.

Jue ke andar  horseracing, football ya cricket par bet lagana, lottery ya prize draws jaise khel bhi shamil hain.

 Quran aur Hadith mein Jue ki Manaahi

Quran aur Hadees dono mein jua ko saaf taur par mana kiya gaya hai.

Kuch aham aayatein aur hadees iske baare mein yeh kehti hain.

Allah Ta’ala ne Surah Al-Maidah (5:90-91)  mein farmaya:

 “Ai imaan walon! Sharab, jua, buton ke liye qurbani dena, aur teer ke zariye taqdeer maloom karna — ye sab shaitaan ke kaam hain, napak cheezein hain. Inse door raho taake tum kamyab ho jao. Shaitaan chaahta hai ke sharab aur jue ke zariye tum mein dushmani aur bughz paida kare, aur tumhein Allah ki yaad aur namaz se roke. Kya tum in cheezon se baaz nahi aoge?”

Isi tarah  Surah Al-Baqarah (2:219) mein Allah ne farmaya:

 “Log tumse sharab aur jue ke baare mein poochte hain. Keh do: In dono mein bada gunaah hai, aur kuch faida bhi hai, lekin unka gunaah unke faide se zyada hai.”

 Nabi Muhammad ﷺ ne farmaya:

“Jo shaks apne dost se kahe ke aao hum jua khelte hain, to usay kafara ke taur par sadqa dena chahiye.”

 (Sahih Bukhari aur Muslim)

 Is hadees se yeh samajh aata hai ke sirf kisi ko jua khelne ka  daawat dena bhi gunaah  hai, to sochiye jo shaks asal mein jua khelta hai uska kya haal hoga.

 Aaj ke daur mein Jue ki misaalein

Agar hum aaj ke  maalī nizaam (financial system) ko dekhein to kai jagah jue ke ansar (elements) nazar aate hain.

Misal ke taur par:

Conventional insurance Islam mein jaiz nahi, kyun ke usmein  riba (sood)  aur  qimar (jua)  dono shamil hote hain.

Kai companies apne fund collect karne ke liye  lottery, prize draw, ya lucky coupon schemes chalati hain — ye bhi jue ki soorat mein aate hain.

Is wajah se  Islami banks aur financial institutions par ye zimmedari hai ke wo aise products aur transactions se bachein jisme jua ya sood ka element ho, aur logon ko  Shariah-compliant (halal)  alternatives dein.

zulm aur na-insafi par mabni amal  

Islam mein jua mana isliye kiya gaya hai kyun ke ye  zulm aur na-insafi par mabni amal  hai. Isme ek shakhs doosre ke nuksan par faida uthata hai. Jua na sirf maal ka zaya hai, balki insani akhlaaq aur muashre ke liye bhi tabah kun hai.

Isliye har Musalman ke liye zaroori hai ke wo  Maysir (Jua)  ke har roop se bach kar rahe, aur apni kamaai ko halal aur paak tareeqe se hasil kare.