Warangal Airport Banane ke liye AAI Tayyar : Ram Mohan Naidu

Warangal Airport  : Telangana ke Warangal shahar ke Mamnoor mein ek naye airport ki taameer hone jaa raha hai. Airports Authority of India (AAI) iske liye puri tarah se tayar hai, aur haal hi mein is project ko Central Govt ki taraf se clearance bhi mil chuki hai. Yeh baat Civil Aviation Minister Ram Mohan Naidu ne kahi.

Unhone bataya ke AAI ne airport ka master plan tayaar kar liya hai aur jaise hi Telangana sarkar zameen ka acquisition complete karke usse AAI ke hawale karegi, waisa hi kaam shuru ho jayega.

Hyderabad me Press conference ke dauraan, Union Minister G. Kishan Reddy ke saath, Ram Mohan Naidu ne kaha ke airport ka Taameer (construction) ka kaam shuru hone ke baad, lagbhag do aur aadha saal me iska kaam pura ho jayega.

500 Carode (crore) rupaye ki lagat

Is airport ke liye kam az kam 500 Carode (crore) rupaye ki lagat aayegi, jisme runway, terminal building aur dusre zaroori Sahulaten (facilities) shamil hai. Unhone ye bhi kaha ke terminal building ki capacity ek survey ke baad tai (decide) ki jayegi.

Mamnoor airport Warangal ko Mulk ke bade shahron ke barabar moqaabil karne ka ek moqa dega. Isse tourism, business, manufacturing aur textile industry ko ek naya boost milega. Unka kehna tha ke Mamnoor airport ki clearance, yahan ke logon ki purani demand thi jo ab puri hone ja rahi hai.

Aazadii se Pahle hi Warangal Airport tha

Unhone yeh bhi yaad dilaya ke Mamnoor airport, aazadi se pehle ke daur me is region ka sabse bada airport tha. 1981 tak yahan kuch sargarmi Chalti Rahi. magar uske baad Hyderabad par zyada dhyan dene ki wajah se isse nazar andaz kar diya gaya.

Filhal, Mamnoor me AAI ke paas 696 acres zameen hai. Yahan pehle se do runways hain jinme se ek 1,500 meter ka hissa kharab halat me hai. Narrow-body flights ko kam az kam 2,800 meter ke runway ki zaroorat hoti hai, isliye aur 280 acres zameen ki maang ki gayi thi.

NOC Milchuki

Magar pichhli state government ki taraf se is maamle me koi sahyog nahi mila. Lekin naye Telangana government ne 280 acres zameen ke acquisition ka order pass kar diya hai aur GMR Hyderabad International Airport Limited (GHIAL) se bhi no-objection certificate mil chuka hai, jisse is project ko aage badhane ka raasta saaf ho gaya.

Telangana sarkar ne iske liye 280 acres zameen kharidne ke liye 205 crore rupaye allocate kiye hain. Yeh airport Airbus 320 aur Boeing 737 category ke aircraft handle karne ke layak hoga.