Gold Smuggling Case | Kannada Actress Pakdi Gayi 15 KG Gold Ke Sath

Kannada Actress Gold Smuggling Case 

 Kannada film actress Ranya Rao ek bade gold smuggling case me pakdi gayi. 15 kilo sona leke Dubai se Bengaluru International Airport pahunchte hi woh Directorate of Revenue Intelligence (DRI) ke haath lag gayi. Yeh mamla sirf ek film actress ka nahi balki ek IPS officer ki beti hone ke natije me aur bhi charchit ho gaya. Police keh rahi hai ki woh kaafi arse se gold smuggling kar rahi thi lekin kisi ko shak nahi ho raha tha.

Ranya Rao Ki Giraftari Kaise Hui?

3 March 2025 ki raat, Dubai se Bengaluru aane wali ek flight me Ranya Rao maujood thi. Jaise hi flight land hui, DRI officials jo pehle se hi information ke base pe alert the, unhone Ranya Rao ko check karne ka faisla kiya.

Ranya ne pehle cooperate karne se mana kar diya, lekin jab officials ne strict legal action ki dhamki di, tab woh maan gayi. Jaise hi checking shuru hui, DRI officials hairan reh gaye kyunki Ranya ke kapdon me chhupa hua 15 kilo gold mila. Yeh sona Dubai se illegal tariqe se India laane ki koshish ho rahi thi. Jaise hi yeh sab confirm hua, officials ne bina deri kiye Ranya Rao ko arrest kar liya.

Kannada Actress Gold Smuggling Case :  Police Ki Karyavahi

Giraftari ke baad 4 March ko Ranya Rao ko judge ke samne pesh kiya gaya. DRI officials ne usko apni custody me rakhne ki demand ki taaki aur pooch-taach ki ja sake. Lekin court ne usko 18 March tak (14 din) judicial custody me bhejne ka order diya. Iska matlab yeh hai ki ab Ranya ko jail me hi rakhna padega.

DRI ab iss baat ki tahqiqat kar rahi hai ki kya Ranya sirf ek courier thi ya fir iske peeche ek bada international gang chhupa hai jo India me gold smuggling ka network chala raha hai.

High Profile Security Ke Saath Smuggling Ka Kaam

Ek film actress hone ke saath saath ek IPS officer ki beti hone ke wajah se, Ranya ke upar kisi ko shak nahi hota tha. Yeh ek major reason hai ki woh kaafi arse se Dubai se gold smuggle karne me successful ho rahi thi.

Bengaluru Airport par uska VIP treatment hota tha, usko airport se direct ek luxury car me le jaaya jata tha, jisme police protection bhi hota tha. Iss wajah se DRI officials ko bhi uspar pehle shak nahi hua. Lekin intelligence reports ke baad jab DRI ne usko track karna shuru kiya, tab yeh saari sachai saamne aayi.

Kannada Actress Gold Smuggling Case : Smuggling Ka Pura Network?

Filhal police aur DRI yeh jaanne ki koshish kar rahi hai ki kya Ranya Rao akeli yeh kaam kar rahi thi ya fir uske peeche koi aur hai. Kuch reports ke mutabiq, yeh ek bada organized crime racket ho sakta hai jisme aur bhi bade naam shamil ho sakte hain.

Jald hi aur bhi bade chehre expose ho sakte hain jo gold smuggling racket ke saath judi hui hain.

Ranya Rao ka yeh case sirf ek film actress ka smuggling case nahi, balki India me bade level par ho rahi gold smuggling ki sachai saamne laane wala ek bada mudda hai. Aane wale dino me naye khulase ho sakte hain jo aur bhi bade naam is scandal me include kar sakte hain.

Ab dekhnay wali baat yeh hogi ki Ranya Rao ko sakt saza milti hai ya phir koi aur raasta nikalta hai.